Ba yaya ba yaya e ehhe ! Ba yaya ba yaya ehhe !

LUWA NSAMU WA MA NSIESE YE MA NGO !

Nsusu nteti buna ya kokila, Ma Ngo vumbukidi ye nsualu-nsualu, ukigetele longa dia masa muna nitu. Lutidi kuna kikuku ye kubikidi nkutu ya madia :
dioko ye nkandi.

Kadi mu bumuimi buani ye makuita ma ku dia Ma Ngo wamanisa nkayi ye bimboko
biakulu biakele zingilanga muna nseki ye muna mfinda.

Ntangu za zingi ma Nsiese go manisa mu kubukuta matiti ma nsue, ta tala ma
Ngo mu lekita biyisi bia yuma bia bibulu ka gonda ye kamana dia ntama. Ma
Nsiese ndambu ye kiadi ndambu ye tusevo ta tala ma Ngo.

Ma Ngo ye ngansi dumini ye yufuele kua ma Nsiese: nki ta tala, ngeye bu
bensi mono Ngo sa ya dia matiti, ya dia pasipolomo ?

Kansi buna kiena nde bibulu biawonso wamana bio manisa , Ma Ngo kafueti sala
masole mpasi kazinga. Idina mu nsiuka wa wunu ma Ngo ukamanisi mu yobila, kengi nkutu ya dioko ye nkandi, bongele kitansi ye kiubi, wela sata ye kenda sole.

Buka yantika ye ngolo zandi za ki Ngo, satila, kenda, satila, kenda, ntangu yi mvuendi gana ngolongota ya ntu, bonso nde nkata banatinanga nkuni. Muini ta yoka nitu ya ma Ngo, kivinsi mpi kieta kaya ye mfuna.

Ma Ngo lembedi, nsatu yi nlendedi. Vuendi ye kutuedi nkutu ya dioko ye
nkandi. Buna katesa ye tula muna n'nua, kiadi , ngansi ye lulendo lumbakidi ye
ukitelle: Mono ? Mono ma Ngo ya dia dioko ye nkandi, mudiambu bibulu biamanisi
mu zi mfinda ye mu zi nseki ?

- Nkatu, nkatu, mboti ya vutuka kuamu ye kivumu ntutu bonso nde n'langi wa
bola kuna gata.

Ma Ngo bongele kitansi ye soka (kiubi) vutukisi kuna gata. Mu nzila nsatu kibeni yeta ku nkuamisa.

Buna ka kuma kaka kuna nsuka ya gata , ma NSiese kayidi : ah ma Ngo tomeni sala ku mfinda kadi mbueni nde tomeni lembana...

Ma Ngo nde : ah ma Nsiese, yambuleti kuaku yaya, mono muntu kibeni ntomeni lembana ye nzala.

Mu ntangu beta yambila ma Nsiese ta bukuta ye kiese ye ngemba masangu ka fukuesingi.
Ma Ngo unyufuedi : kansi nge ma Nsiese mama nki weta dia e ?

Ma Nsiese yandi vo : ah yambuleti mama, nsatu buna yinkotelenge bonso yikotele ngeye, mbokele mama ye yi nkoledi meno ye mfukuesi mau. I momo meno ma mama ngieta dia, nde keti ka bobo ko nga mpasi kibeni.

Ma Ngo lombele kua ma Nsiese keti lenda kungana ndambu ya meno ma ngudi andi
kalekita kani lekita kua mpamba ?

Ma Nsiesi nde : oh nkundi ma Ngo lekita ? Baka koko kua vimba kua meno ye dia, mpeleko nde kulendi yukuta ko.

Ma Ngo didi masangu ye kayidi ye kiese : ah ah ah nkolo meno ma mama i mpila madia ma mpuena !!!

Ma ngo nsualu- sualu ye bokele ngudi andi : mama ah, mama ah, mama ah, nza wisa nsualu ! Kiboba kia ngudi ya ma Ngo wisidi.
Ma Ngo bakidi nzundu (marteau), koledi menu ma ngudi andi. Kiadi ngudi ngani ye kaya ye dila , Ma ngo yandi vo "kulenda ve" sa wamona mama bonso nde kati bueyi meno maku menina ye ntomo.

Ma Ngo bingidi tiya, tudidi nkuni, bakidi kinsu tudidi masa ye meno muna kati kia nzungu ye vuandisi kinsu gana makuku ma kuku.

Fukusa, fukusa ye fukusa, tula, tula ye tula nkuni meno ka ma ka malembana.
Ma ngo yufuedi kua ma Nsiese : kansi bueyi meno ma ngudi wa ngeye makala ma lemfuka e ?

Ma Nsiese yandi vo : oh ma Ngo , a nde kala ye mvibudulu, tula masa , tula nkuni, ku ntuala sa wakala ye kiese, sa wakala kuaku mboti mboti mu dia mu mayangi meno ma ngudia aku.

Ma Ngo tatameni mu fukusa, ku nsuka ta mona ma Nsiese bonso nde yandi weta zola kuenda. Ma Ngo vo : e ma Nsiesie, vingila yafukusa meno ma mama mpasi tua dia mu kimvuka bonso mono ndidingi meno ma ngudi ya ngeye.

Ma Nsiese yandi vo : oh ngeye ma Ngo bu neni bua mpamba a nde
yikukosedingi, mana tudidingi ka meno ma ngudi amu ko, kansi masangu mfukusingi bu kelenge kuna sole.

Ma Ngo ye ngansi zandi za ki NGo zoledi kabaka ma Nsiese ka mfuatakasa.....

Siaaaaaang, ma Nsiese ye ntinu zandi za kinsiese lemokene muna n'sangi suaaaah !

Kiadi kua ma Ngo, ngudi andi ma tandi makulu mabulumukini ye dila ye dila ye dila..... meno mavididi, "mpuku yilutidi nkanda mu buzoba bua ma Ngo" !

Konso diambu yindula nteti wasala diau, kani mfuna yi kutobuele kivumu

Albert KISUKIDI