NGA TU ZOLELE TOMA BETO BESI KONGO?

Masonamene kua Kuluntu Mengi Lutete

Bambuta ba Kongo bau vo: “Ba leke vo ba buaka nsuki, tumbu kua bambuta”

Mu lumbu kia wunu kia makumi mole ye nana, ya ngonda ya febuali, mvu wa mafunda mole ye tanu, mono Mengi Lutete Wa Lutete NeKongo, ngieti soneka mu vana mavimpi kua bana ba besi Kongo ye kabasa ngindu zazi.

Beto, bobo tu vuendi kuku nsi ya Amelika tuka kina kia Septamble 20, 1971, tu muini vo Mindele mbe bantu kuawu bena bonso beto Bantu ba Ndombe, Besi Kongo.

Bonso beto, bawu Mindele bena ye ntu mosi bonso beto; moko mole, bonso beto; malu mole, bonso beto; ntima mosi, bonso beto. Kansi, nki kibeni ki tomisanga Mindele, sulutu Besi Amelika?

Mindele mia nkaka, bobo kaba zolanga beto Bantu ba Ndombe ko, bawu ba kuikilanga vo, Tata Nzambi a Mpungu wa toma sambula Mindele luta Beto Bantu ba Ndombe.  Lukuikilu lulu mbe lua kizoba kibeni luena, kadi Tata Nzambi a Mpungu Yandi kena kani ye luzitu kua Muntu mosi ko, Ndombe ovo Mundele. Idina, Tata Nzambi a Mpungu wu sambulanga bantu bobo ba zolanga N'ku zitisa ye lenvoka, Ndombe ovo Mundele, ovo makanda mamonso.

Mono buyi monanga vo, Mindele miena ye ngindu bonso beto Bandombe, kansi bawu Mindele ba salanga mu kibundu mudiambu dia bakitomisa. Beto Bandombe, Besi Kongo, tuena ye kima kia luta Mindele, kadi mbe beto tuka ntama, tu kadilanga mu kinvuka, ovo dibundu dia kanda, luvila, vata, ..., familia. Kansi beto Besi Kongo katu zeye tula ngolo zeto ye luzolo lueto kumosi ko mpasi vo tuaki sadisa, ye tuaki tomisa mu sala mambu ma nene, bonso sumba tracteur mosi ya vata dia wonso mu sala bilanga ye nzila za bala bala za nene ye za mbote, sumba moteur wa courant mu tula ELETRICITE muna ma vata meto,..., tula bi pompi bia maza mu ma vata meto.

Ovo Mindele ba tanu (5) bena kaka ye 20 francs Congolais konso muntu, ye ba muini kima kiokio kieta fua 100 francs Congolais, bawu si ba zola kibeni tula fi makuta fiawu kumosi mpasi vo ba sumba kima kiokio kiba zolele baka, bonso tracteur, ovo nsaku ya loso.

Kieleka, kani muntu mosi ko wa bawu wena ye 100 francs mu sumba kima kiokio ki ba zolele baka, kansi si tua mona vo konso muntu awu sika kala ye kiese ye mpe ye luzolo lua luingi mu vana 10 francs mu nvula yiyi ye 10 francs mu nvula yi kuiza. Ovo, konso muntu awu vene 20 francs mu nvula zole, ku nima nvula zole bantu ba tanu si ba vana 100 francs, ovo 20 francs x 5 = 100 francs. Ye, siba baka mbongo za fuana mu sumba kima kiokio kiba ba zolele mpasi vo ba toma.

Kansi, beto Besi Kongo, si tua vova konso lumbu mu nvula zole: Tu zolele sumba kima kina, kansi ka tuna ye mbongo za fuana ko, 100 francs!

Ku nima nvula kumi, si tua yimbila nkunga wu mosi kaka: Tu zolele sumba kima kina, kansi ka tuna ye mbongo za fuana ko, 100 francs!

Ku nima nvula kumi ya ye ya, ovo nvula 44 tuka 1960 kina beto, Ngeye ye Mono, tua baka Dipanda ye wunu kiki, tu yimbilanga kaka nkunga wu mosi: Tu zolele sumba kima kina, kansi ka tuna ye mbongo za fuana ko, 100 francs!

Nga tu zolele kibeni toma?

Bika tua ki yuvula kiuvu kiki, ye tua yambula yimbila nkunga wowo wa ntama: Tu zolele sumba kima kina, kansi ka tuna ye mbongo za fuana ko, 100 francs!

Mu ngonda yi kuiza, se ya sonika diaka ye tatamena mu ngindu zazi. Ntete lokola kiokio kia fuana, bobo ba tomene yangalala ye ngindu zazi, ba lenda ku nsonekena mu nkela ame ya masinu ma vento.

Nzola ye ngemba,

Mbuta Mengi

ku Amelika

Nkela a masinu ma vento:  AerospaceEngr83@aol.com